الحلقة الاولي.....مقدمة

1-مقدمة

...بس طويلة شوية J

           قصة السمكة و الطاسة       

يُحكى أن...

كان يا ما كان يا سعد و يا ست اكرام ما يحلا الكلام الا بذكر النبي عليه الصلاة و السلاااام...

عليه الصلاااااااة و السلااااااااااام.....شطار يا ولاد

بيقولك  كان في بنت صغيرة عايشة في قرية صغيرة  برضه...البنت دخلت على امها مرة المطبخ لقيتها بتقلى سمك...وقفت البنت تتفرج...لقت أمها بتقطع راس السمكة و ديلها قبل ما تحطها في الطاسة

البنت استغربت...

سألت أمها..

ليه يا ماما بتقطعي راس السمكة و ديلها؟؟...مش ممكن ناكلهم و ننتفع بيهم؟

ردت الام في ثقة:

-لا يا حبيبتى السمك بيتقلى كدا...لازم نقطع راسها و ديلها قبل ما نقليها

#ايوا ليه بقى نقطعهم؟

-هوا كدا..احنا متعودين على كدا

#ما انا عارفة انكم متعودين على كدا ....انا بسأل ليه؟

الام ردت في زهق:

-بقولك ايه ما تتعبيش قلبي كل الناس بتعمل كدا...اهل القرية كلهم بيقلوا السمك كدا...هتيجي انتى على آخر الزمن تقعدي تقوليلى ليه؟؟....روحي اسألي جدتك هي اللى علمتني أقلي سمك

ما كدبتش البنت خبر و جريت على جدتها....

#يا نينة...عاوزة اعرف ليه بتقطعوا راس السمكة و ديلها قبل ما تقلوها؟؟

الست بصت لها من فوق و تحت و طبطبت على راسها بحنية كده و قالت لها:

-يا حبيبتى السمك ما يتقليش غير كدا...لازم نعمل كدا

البنت ما دخلش دماغها الاجابة المكررة دي....

# يا تيتة مفيش حاجة اسمها هو كدا...لازم سبب...ايه السبب؟؟ ...هي راس السمكة و ديلها دول مسممين؟؟

-لأ...القطط بتاكلهم عادي خالص

# فيهم شوك؟؟

-لأ....ده احنا بناكل الحتة اللى فيها شوك , و نرمي الراس و الديل

# طعمهم مر؟؟

-معرفش ما جربتهاش بس القطط بتتخانق عليهم

ردت البنت في بؤس:

# طب مش ممكن نجرب و يطلع طعمهم حلو ...مش احنا أولى بسمكنا من القطط؟؟

بصيتلها جدتها في حنية بالغة برضه و قالتلها بلهجة الست الخبيرة بقى اللى بتواجه طيش الشباب المتحمس:

-ما ينفعش يا حبيبتى

# ليييييه؟؟

-هو كدا..

# برضه؟؟

-اايوا ....كل الناس بتعمل كدا...السمك بيتقلى كدا

البنت قامت حرصا على صحتها و اتزانها العقلي و حلفت لتلف على الناس دول واحدة واحدة و ست ست في دار دار و زنجة زنجة...

البنت اصلها لسة راجعة من حصة الاحياء فى المدرسة و لسة واخدة درس السمك...و مش لاقية اي تفسير علمي للعادة دي و هي من النوع بعيد عنكم اللى بيشغل دماغه و كدا

و بالفعل....

لفت البنت على القرية كلها لحد ما الستات كلهم دلوها على الست اللى علمتهم قلي السمك في البلد لأول مرة من ييجي تمانيييييين سنة لما عزلت مع جوزها من بلد تانية

البنت راحت لكوخ بعيد كدة ساكنة فيه الست دي...لقت واحدة عجوزة أوي قاعدة ادام الباب....

راحت سلمت عليها و سألتها...

# يا حاجة الناس فى القرية كلهم بيقولولى انك انتى اللى علمتيهم قلي السمك و كلهم بيقطعوا راس السمكة و ديلها قبل ما يقلوها...هو الحاجات دي طعمها مر؟؟

ردت الست العجوزة:

-ابدا...دول طعمهم حلو جدا

# امال ليه علمتيهم يقطعوهم قبل ما يقلو السمك؟؟

الست بصت لها و ضحكت

-هما بيعملوا كدا فعلا؟؟

# ايوا

الست بقت تضرب كف بكف و هي بتضحك و بتقول :-

-يا بنتى انا فاكرة لما لميت عندي بنات البلد اعلمهم قلي السمك...الطاسة بتاعتى كانت صغيرة...فقطعت راس السمكة و ديلها عشان تبقى اد الطاسة

ردت البنت في ذهول

# بس كدا؟؟!!

ردت الست العجوزة:-

-بس كدا....و على فكرة...هما يومها استعجلوا و مشيوا عشان يقلو سمك في بيوتهم....بعد ما مشيوا انا كملت و قليت الراس و الديل لوحدهم و كلتهم عادي جدا....بس دلوقتى الحدادين بقوا يعملوا طاسات واسعة....ليه الستات بتعمل كده مع ان الطاسات وسعت

ابتسمت البنت و ردت

-عشان عقولهم هي اللى ضاقت يا ستو

انتهت القصة.....

يتبع.....